ಭಟ್ಕಳ, ನವೆಂಬರ್ 2:
ಭಟ್ಕಳ ಸಂಶುದ್ದೀನ್ ಸರ್ಕಲ್ ಪ್ರದೇಶದಲ್ಲಿ ನಡೆದ ಘಟನೆಯಲ್ಲಿ, ಮಾದಕ ವಸ್ತು ಸೇವಿಸಿದ ಸ್ಥಿತಿಯಲ್ಲಿದ್ದ ವ್ಯಕ್ತಿಯೊಬ್ಬರು ಮತ್ತೊಬ್ಬರ ಮೇಲೆ ಚಾಕು ದಾಳಿ ನಡೆಸಿದ್ದಾರೆ. ಘಟನೆಯಲ್ಲಿ ವೆಲ್ಡಿಂಗ್ ವೃತ್ತಿ ನಡೆಸುತ್ತಿದ್ದ ಮಂಜುನಾಥ ಮಾಸ್ತಪ್ಪ ನಾಯ್ಕ ಗಂಭೀರವಾಗಿ ಗಾಯಗೊಂಡಿದ್ದಾರೆ.
ಪೊಲೀಸ್ ವರದಿಯ ಪ್ರಕಾರ, ಡಿ.ಪಿ. ಕಾಲೋನಿಯ ನಿವಾಸಿ ನಗೀನಕುಮಾರ ಶೆಟ್ಟಿ ಎಂಬಾತನೇ ಈ ದಾಳಿಗೆ ಕಾರಣವಾದವರಾಗಿದ್ದಾರೆ. ಮಂಜುನಾಥ ನಾಯ್ಕ ಹಾಗೂ ನಗೀನಕುಮಾರ ಶೆಟ್ಟಿ ನಡುವಿನ ಹಳೆಯ ವೈಮನಸ್ಸು ಈ ಘಟನೆಗೆ ಕಾರಣವಾಗಿರಬಹುದು ಎನ್ನಲಾಗಿದೆ.
ಮಾಹಿತಿಯ ಪ್ರಕಾರ, ಅಕ್ಟೋಬರ್ 31ರ ಮಧ್ಯಾಹ್ನ ಮಂಜುನಾಥ ನಾಯ್ಕ ಹಾಗೂ ತಲಗೇರಿಯ ವ್ಯಾಪಾರಿ ಗಣೇಶ ನಾಯ್ಕ ಅವರು ಛಾಯಾ ಲಾಡ್ಜ್ ಹತ್ತಿರದ ಹೋಟೆಲ್ನಲ್ಲಿ ಊಟ ಮುಗಿಸಿಕೊಂಡು ಹೊರಬರುವಾಗ ನಗೀನಕುಮಾರ ಶೆಟ್ಟಿ ಅವರನ್ನು ಎದುರಿಸಿದರು. ನಶೆಯಲ್ಲಿದ್ದ ನಗೀನಕುಮಾರ ಶೆಟ್ಟಿ ಅವರು ವಾಗ್ವಾದ ನಡೆಸಿ, ಅಸಹನೆಗೊಂಡು ಮಂಜುನಾಥ ನಾಯ್ಕ ಅವರ ಮೇಲೆ ಚಾಕು ಚುಚ್ಚಿದರು ಎಂದು ತಿಳಿದುಬಂದಿದೆ.
ದಾಳಿಯಿಂದ ಮಂಜುನಾಥ ನಾಯ್ಕ ಅವರ ಕುತ್ತಿಗೆ, ಹೊಟ್ಟೆ, ತಲೆಯ ಭಾಗ ಮತ್ತು ಕೈಗೆ ಗಂಭೀರ ಗಾಯಗಳಾಗಿದ್ದು, ಅವರನ್ನು ಪ್ರಾಥಮಿಕ ಚಿಕಿತ್ಸೆಯ ನಂತರ ಮಂಗಳೂರಿಗೆ ಸ್ಥಳಾಂತರಿಸಲಾಗಿದೆ.
ಘಟನೆ ತಿಳಿದ ಕೂಡಲೇ ಪಿಐ ದಿವಾಕರ ಪಿ.ಎಂ ಹಾಗೂ ಪಿಎಸ್ಐ ನವೀನ್ ನಾಯ್ಕ ನೇತೃತ್ವದ ಪೊಲೀಸ್ ತಂಡ ಸ್ಥಳಕ್ಕೆ ಧಾವಿಸಿ, ಆರೋಪಿಯನ್ನು ಬಂಧಿಸಿದೆ. ಪ್ರಕರಣದ ತನಿಖೆ ಮುಂದುವರಿಯುತ್ತಿದೆ.
