Bhatkal: ಕರಾವಳಿ ಭಾಗದ ಐತಿಹಾಸಿಕ ಮಹತ್ವ ಹೊಂದಿರುವ ಸರಾಬಿ ನದಿ ಇಂದು ಸಂಪೂರ್ಣ ನಿರ್ಲಕ್ಷ್ಯಕ್ಕೆ ಒಳಗಾಗಿದ್ದು, ಸ್ಥಳೀಯ ನಿವಾಸಿಗಳ ಆತಂಕಕ್ಕೆ ಕಾರಣವಾಗಿದೆ. ಒಮ್ಮೆ ಭಟ್ಕಳದ ಜೀವನಾಡಿಯಾಗಿದ್ದ ಈ ನದಿ ಈಗ ಹೂಳು, ಗದ್ದಲು, ಕಸ ಹಾಗೂ ಒಳಚರಂಡಿ ನೀರಿನಿಂದ ಕಲುಷಿತಗೊಂಡು ತನ್ನ ಅಸ್ತಿತ್ವವನ್ನೇ ಕಳೆದುಕೊಳ್ಳುವ ಹಂತಕ್ಕೆ ತಲುಪಿದೆ.
ಐತಿಹಾಸಿಕ ಹಿನ್ನೆಲೆ ಹೊಂದಿರುವ ಈ ನದಿಯನ್ನು ಚೆನ್ನಾಬೈರಾದೇವಿ ಅವರ ಕಾಲದಲ್ಲಿ ಅರಬ್ಬೀ ಸಮುದ್ರದಿಂದ ಅರಮನೆಗೆ ಸಂಚರಿಸಲು ಬಳಸಲಾಗುತ್ತಿತ್ತು ಎಂಬ ಉಲ್ಲೇಖಗಳಿವೆ. ಆದರೆ ಇಂದು ನದಿಯ ಅನೇಕ ಭಾಗಗಳಲ್ಲಿ ನೀರಿನ ಹರಿವು ಸಂಪೂರ್ಣ ಕುಂಠಿತಗೊಂಡಿದ್ದು, ನದಿಹಾಸು ಒಣಗಿ ಬಯಲಾಗಿರುವ ದೃಶ್ಯಗಳು ಕಂಡು ಬರುತ್ತಿವೆ.ವಿಶೇಷವಾಗಿ ಘೌಸಿಯಾ ಸ್ಟ್ರೀಟ್ ಭಾಗದಿಂದ ಶುದ್ಧೀಕರಿಸದ ಒಳಚರಂಡಿ ನೀರು ನೇರವಾಗಿ ನದಿಗೆ ಹರಿಯುತ್ತಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ಹದಗೆಡಿಸಿದೆ. ಹಲವೆಡೆಗಳಲ್ಲಿ ನಿಂತ ನೀರು, ಕಸದ ರಾಶಿ ಹಾಗೂ ದುರ್ವಾಸನೆಯ ವಾತಾವರಣ ನಿರ್ಮಾಣವಾಗಿದ್ದು, ಸಾರ್ವಜನಿಕ ಆರೋಗ್ಯಕ್ಕೂ ಅಪಾಯ ಉಂಟಾಗುವ ಸಾಧ್ಯತೆ ಇದೆ.
ಪಶ್ಚಿಮ ಘಟ್ಟ ಪ್ರದೇಶದಲ್ಲಿ ಉದ್ಭವಿಸುವ ಸರಾಬಿ ನದಿ ಸುಮಾರು 20 ಕಿಲೋಮೀಟರ್ ದೂರ ಭಟ್ಕಳ ಪಟ್ಟಣದ ಮೂಲಕ ಹರಿದು ಬಂದರಿನ ಸಮೀಪ ಅರಬ್ಬೀ ಸಮುದ್ರ ಸೇರುತ್ತದೆ. ಆದರೆ ಹಲವು ವರ್ಷಗಳಿಂದ ಸಮರ್ಪಕ ಹೂಳೆತ್ತುವ ಕಾಮಗಾರಿ ನಡೆಯದಿರುವುದು, ಅತಿಕ್ರಮಣ ಮತ್ತು ತ್ಯಾಜ್ಯ ವಿಸರ್ಜನೆಯ ಪರಿಣಾಮವಾಗಿ ನದಿಯ ಸಹಜ ಹರಿವು ಬಹುತೇಕ ಸ್ಥಗಿತಗೊಂಡಿದೆ.
ನದಿಯ ದುಸ್ಥಿತಿಯನ್ನು ಗಮನಿಸಿದ ಉತ್ತರ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವರು ಸುಮಾರು ಒಂದು ವರ್ಷದ ಹಿಂದೆ ನದಿ ಸ್ವಚ್ಛತೆ ಮತ್ತು ಪುನಶ್ಚೇತನ ಕಾಮಗಾರಿಗಾಗಿ ₹10 ಕೋಟಿ ಅನುದಾನ ಮಂಜೂರು ಮಾಡಿದ್ದರು. ಯೋಜನೆಯಂತೆ ಮಳೆಗಾಲಕ್ಕೂ ಮುನ್ನ ನದಿಯನ್ನು 10 ಅಡಿ ಆಳಕ್ಕೆ ಹೂಳೆತ್ತುವುದು, ಹೂಳು, ಗದ್ದಲು, ಮುಳ್ಳಿನ ಗಿಡಗಳು ಹಾಗೂ ಕಸದ ತೆರವುಗೊಳಿಸಿ ನದಿಯ ಸಹಜ ಹರಿವನ್ನು ಪುನಃಸ್ಥಾಪಿಸುವ ಉದ್ದೇಶ ಹೊಂದಲಾಗಿತ್ತು.
ಸಣ್ಣ ನೀರಾವರಿ ಇಲಾಖೆಗೆ ಕಾಮಗಾರಿಯನ್ನು ಆದ್ಯತೆಯ ಮೇರೆಗೆ ಕೈಗೆತ್ತಿಕೊಳ್ಳುವಂತೆ ಸೂಚನೆ ನೀಡಲಾಗಿದ್ದರೂ, ಇದುವರೆಗೆ ಯಾವುದೇ ಕಾಮಗಾರಿ ಆರಂಭವಾಗದಿರುವುದು ಸಾರ್ವಜನಿಕರ ಅಸಮಾಧಾನಕ್ಕೆ ಕಾರಣವಾಗಿದೆ.ಸ್ಥಳೀಯರು ಮತ್ತು ಪರಿಸರ ಹೋರಾಟಗಾರರು ಸರಾಬಿ ನದಿಯನ್ನು ತಕ್ಷಣ ಪುನರುಜ್ಜೀವನಗೊಳಿಸಲು ಸರ್ಕಾರ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ. ಇಲ್ಲವಾದರೆ ಮುಂದಿನ ಮಳೆಗಾಲದಲ್ಲಿ ಪ್ರವಾಹ, ಸಾಂಕ್ರಾಮಿಕ ರೋಗಗಳು ಹಾಗೂ ಪರಿಸರ ಹಾನಿ ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಎಚ್ಚರಿಸಿದ್ದಾರೆ.